Маълумоти умумӣ

МАЪЛУМОТ ДАР БОРАИ МИНТАҚАИ ОЗОДИ ИҚТИСОДИИ «ПАНҶ» 

Минтақаи озоди иқтисодии «Панҷ» соли 2009 бо қарори Ҳукумати Ҷумҳурии Тоҷикистон таъсис дода шуда, дар ҳудуди ноҳияи Ҷайҳуни вилояти Хатлон ҷойгир аст. Масоҳати умумии минтақа 401,63 гектарро ташкил медиҳад. Тибқи Низомнома, МОИ «Панҷ» ба навъи тиҷоратӣ-комплексӣ мансуб дониста шудааст. Бояд қайд намуд, ки таъсиси минтақаҳои озоди иқтисодӣ яке аз самтҳои нисбатан нави рушди иқтисоди Ҷумҳурии Тоҷикистон ба ҳисоб меравад. 

Мавқеи ҷуғрофӣ

МОИ «Панҷ» дар наздикии гузаргоҳи сарҳадии «Панҷи Поён» ҷойгир буда, Ҷумҳурии Тоҷикистонро бо Ҷумҳурии Исломии Афғонистон мепайвандад. Чунин ҷойгиршавӣ имкониятҳои васеъро барои рушди робитаҳои тиҷоратӣ-иқтисодӣ ва ҳамкории соҳибкорӣ бо Афғонистон ва Покистон фароҳам меорад.

Дар наздикии ҳудуди минтақа роҳи байналмилалии автомобилгард мегузарад, ки Тоҷикистонро бо Афғонистон ва Ҷумҳурии Ӯзбекистон мепайвандад.

Инфрасохтор

Маъмурияти МОИ «Панҷ» фаъолияти худро соли 2011 оғоз намудааст. Дар ин давра инфрасохтори ибтидоӣ таъсис дода шудааст: хатҳои барқтаъминкунӣ ва обтаъминкунӣ гузаронида шуда, роҳҳои дохилии минтақа ва терминали гумрукӣ сохта шудаанд, инчунин тамоми ҳудуди минтақа бо девор иҳота гардидааст.

Субъектҳо ва фаъолият 

Дар айни замон дар МОИ «Панҷ» 19 субъектҳои дорои самти тиҷоратӣ-коммерсионӣ ва истеҳсолӣ ба қайд гирифта шудаанд.

Дар соли 2024 онҳо ба Ҷумҳурии Исломии Афғонистон ба маблағи зиёда аз 26 млн сомонӣ (тақрибан 2,6 млн доллари ИМА) маҳсулот содир намуданд.

Дар соли 2025 ҳаҷми содирот 17,3 млн сомонӣ (тақрибан 1,7 млн доллари ИМА)-ро ташкил дод.

МОИ «Панҷ» ягона минтақаи навъи комплексӣ дар Ҷумҳурии Тоҷикистон мебошад, ки дар он ҳама намудҳои фаъолият иҷозат дода шудаанд.

Низоми сармоягузорӣ

Сармоягузорони ватанӣ ва хориҷӣ метавонанд ҳамаи намудҳои фаъолиятеро, ки қонунгузории Ҷумҳурии Тоҷикистон иҷозат медиҳад, амалӣ намоянд.

Субъектҳои МОИ «Панҷ» аз имтиёзҳои васеи андозӣ ва гумрукӣ истифода мебаранд:

• озодшавӣ аз ҳамаи намудҳои андозҳо, ба истиснои андози даромад ва андози иҷтимоӣ;
• озодшавӣ аз ҳамаи боҷҳои гумрукӣ ва андозҳо ҳангоми ворид намудани таҷҳизот, техника, нақлиёт, ашёи хом ва молҳо ба ҳудуди МОИ;
• имтиёзҳои шабеҳ ҳангоми содироти маҳсулоти тайёр ба хориҷи ҷумҳурӣ.

Низоми асъор

Дар ҳудуди МОИ «Панҷ» гардиши озоди асъори хориҷии конвертатсияшаванда дар баробари асъори миллӣ иҷозат дода мешавад.

Субъектҳо ҳуқуқ доранд:

• дар бонкҳо ва ташкилотҳои молиявӣ-қарзӣ ҳам дар дохили МОИ ва ҳам берун аз он ҳисобҳо кушоянд;
• амалиётҳои асъорӣ ва ҳисоббаробаркуниҳоро озодона анҷом диҳанд;
• музди меҳнатро бо асъори миллӣ ё хориҷӣ пардохт намоянд.

Фоидаи сармоягузорони хориҷӣ ва музди меҳнати мутахассисони хориҷӣ метавонанд бе монеа ва бе андозбандӣ аз кишвар хориҷ карда шаванд. 

Кафолатҳои давлатӣ

Дар ҳудуди МОИ «Панҷ» кафолат дода мешавад:

• ҳифзи ҳуқуқи моликият ва сармоягузорӣ;
• шароити баробари ҳуқуқӣ барои сармоягузорони ватанӣ ва хориҷӣ;
• ҳифзи ҳуқуқии моликияти зеҳнӣ;
• пешгирии табъиз нисбат ба ширкатҳое, ки сармояи хориҷӣ доранд. 

Бақайдгирии субъектҳо

Барои гирифтани мақоми субъекти МОИ сармоягузор бояд:

1. шахси ҳуқуқиро дар мақомоти андози ноҳияи Ҷайҳун ба қайд гирад;
2. бизнес-нақша ё лоиҳаи сармоягузориро пешниҳод намояд;
3. бо Маъмурияти МОИ шартнома ба имзо расонад.

Ба субъектҳои ба қайд гирифташуда Шаҳодатномаи МОИ «Панҷ» дода мешавад, ки ҳуқуқи пешбурди фаъолият ва истифодаи низоми махсуси ҳуқуқиро тасдиқ мекунад.

Арзиши шаҳодатнома 5000 доллари ИМА (якбора) буда, барои тамоми давраи фаъолияти МОИ «Панҷ» (то соли 2059) амал мекунад. 

Низоми раводид

Барои мутахассисони хориҷӣ тартиби содакардашудаи гирифтани раводид пешбинӣ шудааст:

• муҳлати кӯтоҳи баррасии ҳуҷҷатҳо;
• имконияти гирифтани раводид ҳангоми ворид шудан ба Тоҷикистон;
• мусоидати Маъмурият дар гирифтани раводид, тамдид ва бекор намудани он.

Тамос

Доир ба масъалаҳои бақайдгирӣ ва ҳамкорӣ ба Маъмурияти МОИ «Панҷ» муроҷиат намоед:

Тел.: +992 985 08 36 36 (муовини якуми роҳбар — Тайфурзода Сафаралӣ)

E-mail: tayfurov1961@mail.ru; fezpanj@gmail.com

ТАРТИБИ БАҚАЙДГИРӢ ҲАМЧУН СУБЪЕКТИ МОИ «ПАНҶ» 

1. Пеш аз ҳама бақайдгирии ҶДММ дар мақомоти андози Ҷумҳурии Тоҷикистон

Барои ин зарур аст:

• Қарори муассисон
• тарҷумаи шиноснома (муассис/директор) бо тасдиқи нотариалӣ
• раводид (на камтар аз 3 моҳ барои кишварҳое, ки низоми раводид доранд)
• бақайдгирии ҷои истиқомат
• иҷозатномаи кор
• Оинномаи ҶДММ

2. Гирифтани мақоми субъекти МОИ

• ҳуҷҷатҳои ҳуқуқии ҶДММ (Шаҳодатнома, Замима, РМА)
• ариза ба роҳбарияти МОИ барои гирифтани мақоми субъект
• бизнес-нақша

Дар асоси ин ҳуҷҷатҳо Сертификати субъекти МОИ «Панҷ» дода мешавад, ки арзиши он 5000 доллари ИМА мебошад.

Ҳамчунин шартномаҳои зерин ба имзо мерасанд:

• «Дар бораи ҳамкорӣ байни субъект ва МОИ»
• «Дар бораи иҷораи қитъаи замин»

Пардохти иҷораи замин 0,5 доллари ИМА барои 1 метри мураббаъ дар як солро ташкил медиҳад.

P.S. Маъмурияти МОИ дар раванди бақайдгирии ширкат кӯмак мерасонад.